પાકિસ્તાની ક્રિકેટ ટીમના પૂર્વ કપ્તાન શોએબ મલિકે બીજા લગ્ન કરી લીધા છે. આ લગ્ન એવા સમયમાં થયા છે જ્યારે તેના સાનિયા મિર્ઝા સાથે અલગ થવાના સમાચારો સામે આવી રહ્યા હતા. શોએબ મલિકે પાકિસ્તાની અભિનેત્રી સના જાવેદને પોતાની જીવનસાથી તરીકે પસંદગી કરી છે. એક સમારોહ દરમિયાન આ બંનેના લગ્ન થયા છે.
શોએબે જેની સાથે લગ્ન કર્યા તે સના જાવેદના પણ છૂટાછેડા થયેલા છે. પાકિસ્તાનની પ્રખ્યાત અભિનેત્રીઓમાંની એક સના જાવેદે 2020 માં ઉમૈર જસવાલ સાથે લગ્ન કર્યા, પરંતુ ટૂંક સમયમાં જ ખબર પડી કે આ કપલ વચ્ચે બધું બરાબર નથી. બાદમાં બંનેએ પોતપોતાના સોશિયલ મીડિયા એકાઉન્ટમાંથી એકબીજાના ફોટા ડિલીટ કરી દીધા હતા. એ પછી સમાચાર આવ્યા કે બંનેના છૂટાછેડા થઈ ગયા છે.
28 વર્ષની સના જાવેદ પાકિસ્તાનના ઘણા ટીવી શોમાં જોવા મળી છે, તેના ઘણા પ્રખ્યાત શો છે જેમાં એ મુશ્ત-એ-ખાક, ડંક અને અન્ય સામેલ છે. આ સિવાય તે ઘણા મ્યુઝિક વીડિયોમાં પણ જોવા મળી છે.
સાનિયાની પોસ્ટથી અટકળો વધી હતી
બુધવારે જ સાનિયા મિર્ઝાએ એક રહસ્યમય પોસ્ટ શેર કરી હતી, જેનાથી તેના અને શોએબ મલિક વચ્ચે છૂટાછેડાની અફવાઓ તીવ્ર બની હતી. સાનિયાએ લખ્યું હતું કે, ‘લગ્નજીવન મુશ્કેલ છે. છૂટાછેડા મુશ્કેલ છે. તમારી મુશ્કેલીને પસંદ કરો. સ્થૂળતા અઘરી છે. ફિટ રહેવું મુશ્કેલ છે. તમારી સખત પસંદ કરો. દેવું કરવું મુશ્કેલ છે. આર્થિક રીતે શિસ્તબદ્ધ રહેવું મુશ્કેલ છે. તમારી સખત પસંદ કરો. સંસાર કઠીન છે. સંવાદ કરવો કઠણ છે. તમારી સખત પસંદ કરો. જીવન ક્યારેય સરળ રહેશે નહીં. તે હંમેશા મુશ્કેલ રહેશે. પરંતુ આપણે આપણી મહેનત પસંદ કરી શકીએ છીએ. સાનિયાએ તેના ઇન્સ્ટાગ્રામ સ્ટોરીઝ પર શેર કરેલો ક્વોટ કહે છે, સમજદારીથી પસંદ કરો.
આ અટકળો ત્યારે વધુ તીવ્ર બની જ્યારે સાનિયા મિર્ઝાએ તેના ઇન્સ્ટાગ્રામ પરથી શોએબ મલિક સાથેના તેના મોટાભાગના ફોટા થોડા સમય પહેલા જ ડિલિટ કરી દીધા હતા. 8 જાન્યુઆરીના રોજ એક પોસ્ટ શેર કરતા લખ્યું હતું, જ્યારે કોઈ વસ્તુ તમારા હૃદયની શાંતિને ખલેલ પહોંચાડે છે, તો તેને જવા દો.”